Јавното претпријатие за државни патишта информира дека од 15 јуни ќе стапат во сила измени во системот за наплата на патарините, со кои лентите означени за MTAG ќе можат да ги користат исклучиво возачи што поседуваат електронски таг.
Со новите правила се укинува можноста за плаќање со MCard на MTAG лентите. Корисниците на MCard наплатата ќе ја вршат на останатите ленти предвидени за таа намена на наплатните станици.
Од претпријатието апелираат граѓаните внимателно да ја следат поставената вертикална и хоризонтална сигнализација, како и електронските информативни табли на патарините, каде лентите се јасно означени според начинот на плаќање – електронска наплата (MTAG/MCard) или готовинско плаќање.
Воедно, возачите треба да обрнат внимание и на сигналите за статусот на лентите. Зелената стрелка означува дека лентата е отворена и во функција, додека црвениот знак „X“ означува дека лентата е затворена.
Од ЈПДП предупредуваат дека непочитувањето на означувањето и намената на лентите може да предизвика застои во сообраќајот и да влијае врз безбедноста на учесниците во сообраќајот.
Известувањето е објавено со цел корисниците навреме да се информираат и да се прилагодат на новиот начин на функционирање на системот за наплата на патарините.
