Во Португалија, државната агенција за железници и патишта побара од двајца овчари да платат околу 25.000 евра отштета, откако регионален воз минатата година усмрти 89 овци, пренесува ДПА.
Како што се наведува, државниот оператор на железничката и патната мрежа го оправдува барањето за вкупно 26.400 евра со штетата што била предизвикана на возот, како и со значителни доцнења во железничкиот сообраќај.
Несреќата се случила на 28 декември минатата година во округот Монтемор-о-Велјо, околу 200 километри северно од Лисабон.
Овчарите поднеле жалба на побарувањето, а нивниот адвокат Витор Гаспар изјавил дека станува збор за несреќа без намера и дека ваквите случаи претставуваат дел од општиот ризик на железничкиот сообраќај.
Според изјавата на машиновозачот, тој во зори одеднаш забележал стадо овци на шините додека излегувал од кривина, по што веднаш активирал итно сопирање, но не успеал да избегне судир. Возот застанал околу 540 метри по ударот.
Од вкупно 89 овци, 65 му припаѓале на еден овчар, а 24 на друг.
Поради несреќата биле откажани шест возови, а уште два делумно откажани. Дополнително, регистрирани биле доцнења на 36 линии, во вкупно траење од 580 минути.
