Њујорк Никс избори пласман во големото НБА финале за првпат по 1999 година, откако убедливо го совладаа Кливленд Кавалирс со 130:93 во четвртиот натпревар од финалето на Источната конференција и ја добија серијата со максимални 4-0.
Тимот од Њујорк доминираше во текот на целиот меч, а придонес во победата дадоа речиси сите кошаркари кои добија минутажа. Најефикасен беше Џејлен Брансон со 15 поени, додека Карл-Ентони Таунс натпреварот го заврши со 19 поени и 14 скока. Двоцифрен учинок имаа и ОГ Ануноби со 17 поени, Ландри Шамет со 16, Микал Бриџис со 15 и Мајлс Мекбрајд со 11 поени. Џош Харт додаде шест поени и 11 скока.
Патот на Никс до титулата во Источната конференција не започна идеално. Во првото коло од плејофот тие губеа со 2-1 во серијата против Атланта Хокс, но потоа целосно го променија текот на сезоната и врзаа дури 11 последователни победи.
По елиминацијата на Атланта, тимот од Њујорк беше подобар и од Филаделфија 76ерс, а потоа без поголеми проблеми го совлада и Кливленд за место во големото финале.
Последен пат Никс настапија во НБА финалето во 1999 година, кога беа поразени од Сан Антонио Спарс со 4-1 во серијата. Таа сезона остана запаметена и по тоа што тимот од Њујорк стана првиот осми носител кој стигнал до финале во историјата на НБА.
Во финалето Никс ќе играат против победникот од Западната конференција, каде за шампионската титула се борат Сан Антонио Спарс и Оклахома Сити Тандер.
