Претседателката Гордана Сиљановска-Давкова по повод 24 Мај – Денот на Свети Кирил и Методиј порача дека нивното дело претставува темел на духовниот и културниот идентитет на словенските народи, вклучувајќи го и македонскиот народ.
Таа истакна дека солунските браќа се меѓу ретките историски личности кои се препознаени како апостоли и заштитници на Европа, нагласувајќи ја нивната улога како творци на глаголицата, просветители и описменувачи на словенските народи.
Според Сиљановска-Давкова, нивното дело и денес има силна обединувачка моќ и претставува значајно европско и цивилизациско наследство.
Претседателката посочи дека јазикот е многу повеќе од средство за комуникација, бидејќи ја носи колективната меморија, вредностите и чувството на припадност на еден народ низ генерациите.
Во честитката таа нагласи дека во време на поделби и отуѓеност, културата, образованието и науката остануваат основа за градење доверба, заедништво и напредок во општеството.
„Светите Кирил и Методиј овозможија словенските народи својата мисла, вера и културна самосвест да ги изразуваат на сопствен јазик“, порача претседателката, честитајќи го празникот 24 Мај.
