Американските медиуми го идентификуваа вооружениот напаѓач кој отвори оган во близина на Белата куќа како 21-годишниот Насире Бест, лице кое претходно било познато на безбедносните служби и имало историја на психички проблеми.
Инцидентот се случил во саботата попладне во близина на зградата на извршната канцеларија Ајзенхауер, кога напаѓачот извадил оружје и почнал да пука. Агентите на Тајната служба веднаш реагирале и возвратиле со оган, при што Бест бил смртно ранет. Во нападот бил повреден и еден минувач, додека меѓу агентите немало повредени.
Американскиот претседател Доналд Трамп ја пофали брзата и професионална реакција на Тајната служба.
Според информациите на CBS, Бест и претходно бил во фокусот на властите. Во јуни минатата година бил приведен откако го блокирал пристапот до Белата куќа и тврдел дека е „Бог“, по што бил испратен на психијатриска проценка. Само еден месец подоцна повторно бил уапсен при обид да влезе во комплексот на Белата куќа, по што судот му изрекол забрана за приближување.
Истрагата открила и низа необични објави на социјалните мрежи, меѓу кои тврдења дека е „вистинскиот“ Осама бин Ладен, како и содржини што укажувале на можни закани кон Трамп. Сепак, според полициски извори, досега не бил регистриран како насилен или вооружен при претходните инциденти.
Истрагата за мотивите и околностите на нападот продолжува, а безбедносните мерки околу Белата куќа остануваат засилени.
