Министерот за внатрешни работи на Србија, Ивица Дачиќ, изјави дека 23 лица биле приведени по инцидентите што се случиле по студентскиот протест во Белград, додавајќи дека полицијата употребила минимални средства за принуда откако била нападната. Според него, во настаните биле повредени и повеќе полициски службеници.
Дачиќ посочи дека и покрај претходните апели протестот да помине мирно, дошло до сериозно нарушување на јавниот ред и мир и до, како што рече, неиспровоцирани напади врз полицијата.
Претседателот на Србија, Александар Вучиќ, оцени дека инцидентите испратиле лоша слика за државата и повторно ги повика учесниците на дијалог. Во видео-обраќање тој порача дека насилството не е решение и дека е потребно меѓусебно почитување меѓу граѓаните.
Големиот студентски протест во Белград започна околу 18 часот и траеше до 20 часот без поголеми проблеми. Студентите презентираа дел од својата програма поврзана со образованието, економијата и правосудството, а на собирот присуствуваа десетици илјади граѓани.
Инцидентите избувнаа околу половина час по завршувањето на протестот, во близина на Пионирскиот парк, кога помала група маскирани лица почнала да фрла пиротехнички средства и други предмети кон полицијата, по што следувала интервенција на безбедносните сили.
Студентите во блокада соопштија дека повеќе лица биле приведени и повредени, а дел од нив биле пренесени во здравствени установи и полициски станици.
Од Вишо јавно обвинителство Белград најавија дека сите лица кои нападнале полициски службеници ќе бидат идентификувани и кривично гонети.
Во меѓувреме, директорот на полицијата Драган Васиљевиќ изјави дека на протестот присуствувале околу 34.300 лица, додека организацијата Архив на јавни собири соопшти дека станува збор за едно од најмасовните студентски собирања досега и процени дека бројот на присутни надминал 100.000 граѓани.
