Основното јавно обвинителство Скопје отвори истражна постапка против 25-годишна жена осомничена за обид за внесување наркотични дроги во Казнено-поправната установа „Идризово“.
Според информациите од обвинителството, случајот бил откриен на 20 мај, кога жената дошла во посета на својот сопруг кој издржува затворска казна. При контролата, таа носела две табли со вкупно 60 јајца, но деталниот преглед со скенер и рачна проверка открил дека во 28 од нив биле скриени пакувања со дрога.
При претресот биле пронајдени 318,62 грама марихуана и 142,2 грама кокаин, по што против осомничената била поведена постапка за кривично дело неовластено производство и пуштање во промет наркотични дроги.
Од Обвинителството наведуваат дека, и покрај сериозноста на делото и постоењето опасност од бегство, при одлучувањето за мерката биле земени предвид нејзините семејни околности.
Како што посочуваат, осомничената е мајка на малолетни деца, меѓу кои и петмесечно бебе, поради што јавниот обвинител предложил мерка куќен притвор.
