Во тешката сообраќајна несреќа што се случи на скопската обиколница, меѓу четирите жртви се и баритонот на Македонската опера и балет, Ристе Велков, и неговиот 20-годишен син Адам Велков. Велков беше оперски солист и еден од водечките македонски баритони со богата уметничка кариера.
Познат е идентитетот на уште една жртва – Петар Миланов (20) од Скопје, додека се работи на идентификација на четвртото починато лице.
Во текот на својата кариера, Велков има реализирано 26 оперски улоги и настапувал во повеќе од 15 водечки роли во дела како „Набуко“, „Риголето“, „Магбет“ и „Травијата“, со што остави значаен белег во македонската оперска сцена.
Според информациите од МВР, несреќата се случила синоќа во 23:00 часот на делницата меѓу надвозникот Визбегово и клучката Мирковци. Товарно возило „ман“ со косовски регистарски ознаки, управувано од 76-годишниот Б.Б. од Косово, изгубило контрола, ја пробило заштитната ограда и навлегло во спротивната насока на автопатот, каде што директно се судрило со патничко возило „БМВ“ со скопски таблички, управувано од Ристе Велков (51).
По силниот судир избувнал пожар во двете возила, при што автомобилот и кабината на камионот целосно изгореле. Пожарот бил изгаснат од екипи на Бригадата за противпожарна заштита Скопје.
Сите лица кои се наоѓале во патничкото возило починале на лице место. Смртта ја констатирал лекар од Итната медицинска помош, а по наредба на јавен обвинител телата на жртвите се дадени на обдукција.
Возачот на камионот е лишен од слобода и задржан во полициска станица, а истрагата за причините за несреќата е во тек.
