ВМРО-ДПМНЕ реагира дека приговорот поднесен од ЕСМ против одлуката за запирање на истрагата за случајот „Мазут“ отвора можност предметот повторно да биде активиран и, како што наведуваат, претставува доказ за непрофесионално и селективно постапување на обвинителите Катерина Коларевиќ и Ислам Абази.
Од партијата тврдат дека истрагата не била запрена поради недостиг на докази, туку како резултат на, како што велат, политички мотивирана постапка насочена кон заштита на лица блиски до СДСМ и ДУИ.
Во нивната реакција се наведува дека приговорот на ЕСМ е директен показател дека доказите биле селективно оценувани, а дел од клучните факти биле игнорирани со цел затворање на случајот поврзан со набавка на мазут за ТЕЦ Неготино, вредна 167 милиони евра.
ВМРО-ДПМНЕ оценува и дека е проблематично тоа што, според нив, не бил извршен распит на поранешниот директор на ЕСМ, Васко Ковачевски, додека други изјави биле земени како релевантни.
Од партијата сметаат дека ваквиот развој на настаните претставува компромитирање на истрагата и нагласуваат дека приговорот на ЕСМ може да биде основа за повторно разгледување на одлуката за нејзино запирање.
Понатаму, обвинуваат дека Обвинителството им дало поголема тежина на исказите на одредени лица, додека други клучни актери не биле опфатени во постапката.
На крајот, ВМРО-ДПМНЕ порачува дека обвинителството треба да покаже независност и да одлучи дали ќе постапува професионално или ќе биде под влијание на политички и бизнис центри на моќ.
Истрагата за набавката на мазут за ТЕЦ Неготино претходно беше запрена од Обвинителството за гонење организиран криминал и корупција, со образложение дека нема доволно докази за кривично дело и финансиска штета. Според првичната пријава, државата била оштетена за над 167 милиони евра.
