По речиси 17 години од една од најтрагичните авионски несреќи во поновата историја, Апелацискиот суд во Париз ги прогласи „Ер Франс“ и „Ербас“ за виновни за убиство од небрежност во случајот со летот АФ447, во кој во 2009 година загинаа 228 лица.
Судот оцени дека авиокомпанијата и производителот на авионот сносат целосна одговорност за трагедијата што се случи на рутата Рио де Жанеиро – Париз, кога авионот се урна во Атлантскиот Океан за време на невреме. Во несреќата животот го загубија сите 216 патници и 12 членови на екипажот.
Иако двете компании беа ослободени од одговорност во првостепената постапка во 2023 година, по новото судење Апелацискиот суд донесе пресуда со која ги прогласи за виновни и им изрече максимална парична казна од по 225.000 евра.
Претставниците на семејствата на жртвите ја поздравија пресудата како важен чекор кон правда, иако дел од нив сметаат дека изречените казни се симболични во споредба со размерите на трагедијата.
Авионот се урна на 1 јуни 2009 година од височина поголема од 11.000 метри, а остатоците и црните кутии беа пронајдени по долгогодишна и сложена потрага на дното на Атлантскиот Океан.
Истрагата утврди дека до несреќата довела комбинација од неисправни сензори за брзина и несоодветна реакција на пилотите во критичен момент. По трагедијата беа воведени промени во обуката на пилотите и беа заменети спорните сензори на истиот тип авиони.
Несреќата на летот АФ447 и денес останува најсмртоносната катастрофа во историјата на француското цивилно воздухопловство.
