Фудбалска федерација на Македонија остро го осуди навредливото и недолично однесување на ФК Вардар за време на прославата на шампионската титула, откако на социјалните мрежи се појавија видеа на кои фудбалери пеат песна со вулгарна и навредлива содржина.
Од ФФМ порачаа дека ваквото однесување е неприфатливо без разлика кон кого е насочено и дека говорот на омраза, навредите и неспортското однесување немаат место во фудбалот.
„Ривалитетот меѓу екипите е посакуван и здрав само кога е достоинствен и исполнет со меѓусебна почит“, наведуваат од Федерацијата.
Во реакцијата се додава дека ФФМ и претходно санкционирала клубови поради слични инциденти, меѓу кои ФК Тиквеш, ФК Победа, ФК Вардар и ФК Шкендија, и дека ќе постапува согласно дисциплинските правилници.
Федерацијата информираше дека дисциплинскиот инспектор веднаш ќе отвори постапка против клубот во врска со последните случувања.
Осуда за инцидентот упати и министерот за спорт Борко Ристовски, кој најави дека Министерството ќе бара начин за санкционирање на ваквото однесување.
Тој посочи дека се осудуваат сите навреди, особено кога во нив се вклучени спортисти, селектори и јавни личности, додавајќи дека слични инциденти имало и претходно.
На видеата што се проширија на социјалните мрежи, дел од фудбалерите на ФК Вардар пеат песна со навредлива содржина насочена кон Битола и македонската пејачка Каролина Гочева.
