На началникот на Полициската управа во Белград, Веселин Милиќ, одреден му е 30-дневен притвор, објавија утрово српските медиуми. Тој се сомничи за непријавување кривично дело, прикривање на сторител и помагање по извршено убиство.
Според истрагата, на 12 мај Милиќ организирал средба во ресторан во белградската населба Сењак меѓу двајца криминалци со цел да ги смири нивните нарушени односи. Но, состанокот ескалирал кога едниот од нив, Саша Вуковиќ, пукал и го убил Александар Нешовиќ пред очите на Милиќ.
Наводно, припадници на обезбедувањето на началникот, кои се полицајци, му помогнале на напаѓачот да го отстрани телото, кое подоцна било запалено покрај автопат. Истовремено, дел од присутните останале во ресторанот за да ги отстранат трагите и снимките од безбедносните камери.
Во случајот е уапсен и келнер од ресторанот, а судот одредил притвор за Милиќ поради опасност од влијание врз сведоци и уништување докази. По избувнувањето на скандалот, тој е разрешен од функцијата.
