Опозициската СДС предводена од Венко Филипче ја продолжува антинационалната и антидржавната политика започната од Зоран Заев, која директно оди во интерес на бугарските власти, обвинија денеска од владејачката ВМРО-ДПМНЕ.
На прес-конференција, членот на Централниот комитет на партијата, Валентин Манасиевски, истакна дека раководството на СДС нема никаков проблем со негирањето на македонскиот идентитет.
„Заев започна со бришење на терминот „македонски’’ од сите државни институции, а сега неговиот потрчко и чувар на фотелјата во СДС, Венко Филипче е спремен на тоа празно место да напише „северномакедонски’’. Само СДС и Филипче немаат проблем кога некој не нарекува „северномакедонци’’, затоа за нив тоа е успех и се горди на тоа“, изјави Манасиевски.
Според него, социјалдемократите свесно прифаќаат позиции со кои се штети на македонската историја и јазик.
„Само Филипче и СДС, и нивниот врховен лидер Заев, немаат проблем да водат антинационална и антидржавна политика, која е во интерес на бугарските власти. За нив, нема ништо лошо во тоа Бугарија да го негира нашето постоење пред 1944 година, нашите револуционери и дејци да бидат Бугари и нашиот македонски јазик да биде произлезен или пак дијалект на бугарскиот јазик“, подвлече Манасиевски.
Од ВМРО-ДПМНЕ посочуваат дека барањата за итни уставни измени се само првиот чекор од низата барања кои Софија ги подготвува за Македонија. Тие јавно го прашаа Филипче дали е уценет од група бугарски политичари и дали во тоа е вмешан и Зоран Заев.
Од партијата порачаа дека државата мора да изгради цврст став во процесот на евроинтеграциите.
„Филипче треба да се вразуми и да ги штити македонските интереси, а не бугарските интереси. Македонија мора да добие јасни гаранции дека уставните измени ќе бидат последното барање за влез на Македонија во ЕУ. Македонија мора да влезе во ЕУ како достоинствена, горда и исправена држава, а не наведната, усрамена и понижена како што беше со влезот во НАТО алијансата“, заклучи Манасиевски.
