Тензиите во Реал Мадрид очигледно достигнаа врв, откако во јавноста се појавија информации за жесток конфликт меѓу Федерико Валверде и Орелиен Чуамени за време на тренинг.
По бројните шпекулации дека дошло до физичка пресметка, Валверде вечерва се огласи со објава во која негира дека бил удрен од својот соиграч, иако потврди дека меѓу нив имало расправија.
Уругвајскиот репрезентативец објасни дека заморот, разочарувањето од сезоната и акумулираната фрустрација довеле до конфликт, но потенцираше дека не станувало збор за тепачка.
Според неговата верзија, при расправијата случајно удрил во маса, при што заработил мала повреда на челото, поради која морал да замине во болница на рутински преглед.
„Во ниту еден момент мојот соиграч не ме удри, ниту јас него“, порача Валверде, додавајќи дека некој намерно шири гласини и ја преувеличува ситуацијата поради тешката сезона на клубот.
Тој призна дека атмосферата во тимот е напната по елиминацијата од Лига на шампиони и неуспешната сезона без трофеи, но истакна дека сите недоразбирања остануваат надвор од теренот кога станува збор за борба за клубот.
Валверде во емотивната порака изрази жалење за целата ситуација и посочи дека најмногу го боли што поради медицински причини нема да може да настапи на следниот натпревар.
