Вардар 1961 оствари победа над Монпелје со 27-24 (17-12), но тоа не беше доволно за пласман понатаму, па скопскиот тим го заврши настапот во четвртфиналето на Европската лига на ЕХФ. И покрај одличната игра, Вардар не успеа да ја надомести високата негатива од првиот натпревар во Франција.
Домашниот тим влезе силно во мечот во СЦ „Јане Сандански“, каде уште од стартот се истакна голманот Валах со неколку клучни интервенции. Со головите на Хориха и Малус, Вардар рано поведе, а предноста постепено растеше и достигна „плус пет“ во првиот дел.
Иако Монпелје се обидуваше да се врати, вардарци одржуваа контрола врз резултатот. Натпреварот донесе и тензичен момент кога Митровиќ доби црвен картон по груб старт, но тоа не го поколеба домашниот тим, кој на полувреме замина со убедливи 17-12.
Во второто полувреме Вардар ја зголеми предноста и на моменти имаше и „плус седум“, давајќи надеж дека може да направи сензација. Сепак, серија грешки во нападот им овозможи на гостите да ја намалат разликата и да ја задржат вкупната предност од двомечот.
Во финишот, кога вардарци почнаа да губат свежина, францускиот тим успеа да го ублажи поразот и да обезбеди пласман во полуфиналето.
