Екипата на Вардар направи голем чекор кон шампионската титула откако славеше како гостин против Башкими со 0-2. Со оваа победа, „црвено-црните“ се на чекор до титулата и во преостанатите три кола им е потребна уште само една победа за да станат шампиони.
На неутралниот терен во Гостивар, избраниците на тренерот Гоце Седлоски доминираа од самиот почеток. Водството го донесе Горан Закариќ по асистенција на Стефан Цветковиќ, а пред крајот на првото полувреме предноста ја зголеми Бобан Николов, кога топката со помош на противнички играч заврши во мрежата.
Во вториот дел Вардар рутински го контролираше натпреварот и не дозволи изненадување, задржувајќи ја предноста до самиот крај. Со новите три бода, тимот се одлепи на плус шест во однос на Шкендија и е во одлична позиција да ја прекине петгодишната доминација на Шкендија и Струга Трим Лум.
Во следното коло, Вардар ќе го пречека тимот на Силекс, каде може и математички да ја завери шампионската титула.
