Несреденоста во скопскиот јавен сообраќај наскоро ќе се средела. Ова го најави градоначалникот Орце Ѓорѓиевски велејќи дека пристигнувањето на новите 100 автобуси се гаранција за тоа. Инаку, постапката за набавка на автобусите од страна на Владата е веќе во завршна фаза.
Но, прашањето е – дали само со нови автобуси ќе го решат проблемот?
Оти џабе се и 100 нови автобуси ако не се среди хаосот во ЈСП и ако претпријатието продолжи да функционира како досега.
Новите автобуси ќе го збогатат возниот парк на ЈСП, но нема да ги решат долгогодишните системски проблеми на претпријатието: лошото менаџирање, слабата организација и финансиските загуби.
Ако скопското претпријатие и понатаму работи со истата логика, многу лесно може повторно да се случи утре да има нови автобуси, ама пак да нема гориво или возачи или среден возен ред.
Затоа, Ѓорѓиевски не треба да чека до септември за да стигнат новите автобуси, туку веднаш да почне со средување на хаосот во ЈСП – со реорганизација, контрола и воведување на домаќинско работење.
