Македонското образование е на ниски гранки, ама е полно со разни факултети и институти. За среќа, оваа власт сака во сето тоа да постави ред, па од почетокот на годинава, ресорното министерството ги контролира приватните научни институти и откри сериозни неправилности. До сега се затворени вкупно 14 институти.
Контролите изнајдоа институти кои функционирале само формално, без соодветен кадар и инфраструктура, а сега најново откритие е научен институт за биометриски истражувања, со дозвола добиена во 2022 година од претходната влада, регистриран во магацин на обложувалница во Визбегово, со две столчиња, едно биро и душек. Немало лаборатории и истражувачи.
Што ли вежбале – учеле на душекот, да се надеваме ќе се открие наскоро. Ваквите работи пак го отвораат прашање – дали проблемот е во законите или во контролата за нивното спроведување?
Оти ова не е изолиран пример, а секогаш сценариото е исто: закони има, но не се почитуваат, правила постојат, но се заобиколуваат, а контролата
обично доаѓа предоцна. Токму затоа и ни се случија трагедии како пожарот во Кочани, „Дурмо Турс”, модуларната болница во Тетово. Ова се класични
примери во кои некој ги прекршил правилата, а институциите задоцниле. Ако надзорот бил навремен, голем дел од овие примери немаше ни да се случат.
Случајот со „обложувалничкиот институт” отвора и уште две дилеми. Прво кој се издава лиценци и на каков начин, а второ уште колку вакви фиктивни институции постојат во различни сфери од општествениот живот и дали евентуално црпеле пари од буџетот?
Секако, следи и прашањето, ќе одговара ли некој за вавките манипулации и злоупотреби?
