Во Кривичниот суд Скопје почна судењето на Стојанче Јовановски, по обвинение дека ја натерал сопругата Ивана да си го одземе животот во прегратка со нивната 6-годишна ќерка, но и за семејно насилство и малтретирање.
Според обвинението, тој извршил загрозување на сигурноста, тешка телесна повреда при семејно насилство и наведување на самоубиство. Јовановски подолг временски период сурово и нечовечно постапувал кон сопругата, која спрема него се наоѓала во положба на фактичка и егзистенцијална зависност и подреденост, па поради таквото постапување таа на 2 март извршила самоубиство.
Во воведните зборови, обвинителката изнесе со кои вулгарни зборови и страшни закани по животот, обвинетиот и се обраќал на сопругата додека ја тепал.
Цело време додека зборуваше обвинителката, Стојанче Јовановски се смееше и мафташе со глава во знак на негодување.
По воведните зборови, сведочеше мајката на жртвата. Таа кажа дека не знаела оти имаат проблеми, иако се сомневала во тоа, бидејќи ја гледала ќерка и постојано со модринки по рацете, а еднаш и било модро и окото.
„Се сомневав дека е тепана, ама Ивана не ми признаваше. Од Катја дознавав: ‘Бабо јас ќе ти кажам, ама не ѝ кажувај на мама. Мама вака чучнуваше доле, а тато ја шутираше,“ сведочеше мајката на Ивана.
Јовановски се изјасни за виновен само за тешка телесна повреда во семејно насилство и за загрозување на сигурноста, но тој рече дека не ја натерал да се самоубие.
