Независен синдикат на полицијата остро реагира по инцидентот што се случил синоќа пред дискотека во Скопје, при кој, според нив, биле нападнати двајца полициски службеници од ПС ОН Карпош.
Од Синдикатот информираат дека полицајците биле нападнати од алкохолизирани лица и притоа се здобиле со тешки телесни повреди.
Во реакцијата изразуваат незадоволство од одлуката на обвинителството осомничените да бидат ослободени и да не бидат изведени пред суд во итна постапка. Според нивните наводи, првично биле дадени насоки за ваква постапка, но подоцна одлуката била променета.
Синдикатот тврди дека до промената дошло по наводна интервенција од висок владин функционер, по што бил сменет и обвинителот задолжен за случајот. Дополнително, како што наведуваат, во постапката бил вклучен и секторот за внатрешна контрола, кој сега ќе ја проверува работата на полициските службеници.
Оттаму бараат сериозен и темелен пристап од надлежните институции и најавуваат дека внимателно ќе го следат развојот на случајот.
Воедно, најавуваат дека ќе испратат писмена реакција до Основното јавно обвинителство и до министерот за внатрешни работи, потенцирајќи дека напад врз полициски службеник со тешки последици претставува сериозно кривично дело кое не смее да биде занемарено.
