Владината мерка околу цената на горивата делува малку смирувачки. Во пресрет на очекуваното понеделничко ново поскапување, министрите вчера одлучија да го намалат ДДВ-то. Тоа го ублажува ценовниот притисок врз граѓаните и стопанството.
Требаше ли ова да се направи минатиот понеделник?
Власта вели дека се е навремено и дека и понатаму Македонија има најниски цени на горивата. Од опозицијата, пак, велат дека мерките се недоволни и задоцнети.
Граѓаните со поделено мислење околу навременоста на мерките, но едногласно стравуват дали даночното олеснување ќе биде доволно за да се спречи нов бран поскапувања, особено во маркетите. Тие на социјалните мрежи велат дека дел од трговците веќе избрзаа со покачување на цените уште минатата недела. Затоа и бараат повеќе инспекциски надзори.
Воедно, јавноста очекува оваа владина мерка да биде само прв чекор и бара дополнителни мерки: замрзнување на цените на одредено ниво и контрола на трговските маржи.
Во меѓувреме, дел од земјите во регионот веќе презедоа посеопфатни мерки. Србија и Хрватска воведоа ограничување на маржите и даночни олеснувања, додека слични комбинирани интервенции има и во Словенија и Бугарија.
Македонската Влада ќе мора да остане будна, внимателно да ја следи состојбата и со засилени контроли да спречи евентуални злоупотреби.
Во време на криза, најважно е да се заштити стандардот на граѓаните, а не профитот на трговците.
