Три угостителски објекти во скопската општина Аеродром ќе се соочат со кривични пријави, откако полициска контрола утврдила дека во нив се служел алкохол на малолетници.
Контролите биле спроведени во периодот од 19 до 22 март од страна на полициски службеници од ЕВР Аеродром и Драчево при СВР Скопје, при што биле опфатени вкупно 12 угостителски објекти.
При акцијата, во три од контролираните локали биле затекнати малолетни лица на кои им бил послужен алкохол, што претставува кривично дело согласно законите.
Од Министерството за внатрешни работи информираат дека по целосно документирање на случаите ќе бидат поднесени соодветни кривични пријави против одговорните лица.
Надлежните најавуваат дека ваквите контроли ќе продолжат и во наредниот период, со цел спречување на незаконско точење алкохол и заштита на малолетниците.
