Со изборот на Ненад Савески за нов државен јавен обвинител, правосудството доби нова шанса, а тој доби обврска – да ја врати изгубената доверба кај граѓаните. Ова не е само кадровска промена, туку тест дали системот конечно ќе почне да функционира.
Првата и најважна задача е јасна – бескомпромисна борба против високата корупција. Граѓаните со години гледаат како големи случаи се отвораат, а од друга страна многу предмети остануваат заглавени во обвинителските фиоки.
Затоа очекувањето е конечно да се процесуираат предмети поврзани со злоупотреба на функција, сомнителни тендери и јавни набавки.
Посебен фокус мора да има за енергетскиот сектор, каде во изминатите години се свртеа голем пари, но и во здравството, каде јавноста се уште бара одговори за спорните набавки, особено во Ковид кризата.
Не помалку важни се и трагедиите што ја потресоа јавноста, случаи во кои се бара одговорност за системски пропусти и изгубени човечки животи. Оти џабе се и сто анкетни комисии, ако обвинителството сериозно не се посвети во расчистување со случаите.
Дополнително, потребно е и внатрешно прочистување и одговорност за обвинители кои во минатото не постапувале или работеле селективно.
Ова е момент кога новиот обвинител мора да покаже дека законот важи за сите. Во спротивно ќе гледаме уште една пропуштена шанса и уште една промашена обвинителска приказна.
