Американскиот претседател Доналд Трамп изјави дека Иран е воено ослабен, но дека е „многу добар во ширење лажни информации“, обвинувајќи ги и медиумите дека не ги пренесуваат резултатите од американската воена кампања.
Во објава на својата социјална мрежа Трут Соушал, Трамп тврди дека американската војска извела еден од најсилните воздушни напади во регионот на Блискиот Исток, при што биле погодени клучни ирански цели. Според него, со тие напади сериозно биле ослабени воените капацитети на Иран.
Трамп посочи дека Иран во моментов се наоѓа во значително послаба позиција, но дека и покрај тоа продолжува активно да шири дезинформации за ситуацијата на теренот.
Американскиот претседател додаде дека засега не е погодена нафтената инфраструктура на островот Харг, но предупреди дека таа одлука може да се промени доколку Техеран се обиде да го загрози слободното движење на бродовите низ Ормускиот теснец.
Тој воедно го повика Иран да го положи оружјето и да прифати договор, нагласувајќи дека земјата веќе претрпела сериозни загуби во текот на конфликтот.
