Вооружен маж е убиен откако со автомобил влетал во синагога во пошироката област на Детроит во Мичиген, пренесуваат американските медиуми.
Според информациите од полицијата, осомничениот пристигнал со возило пред синагогата, по што обезбедувањето го забележало и дошло до размена на оган. Во инцидентот напаѓачот бил застрелан.
Настанот се случил во синагогата Темпл Израел во Вест Блумфилд, во округот Оукленд. По инцидентот, властите евакуирале училишта во околината и ги повикале жителите да останат во засолниште додека трае полициската операција.
Снимки објавени на социјалните мрежи покажуваат чад што се издига од покривот на зградата, додека безбедносните служби ја пребаруваат внатрешноста на објектот.
Од Еврејската федерација на Детроит соопштија дека се запознаени со безбедносниот инцидент и дека еврејските институции во регионот привремено вовеле засилени мерки на безбедност.
На местото на настанот пристигнале десетици полициски и итни служби од повеќе градови во округот Оукленд, меѓу кои и државната полиција, како и полициските одделенија од Вест Блумфилд, Фармингтон Хилс, Клосон, Обрн Хилс, Бирмингем и Плезент Риџ.
Портпаролот на канцеларијата на шерифот на округот Оукленд, Стивен Хубер, изјави дека полицијата ја пребарува зградата за да се утврдат сите околности на настанот.
Гувернерката на Мичиген, Гречен Витмер, изјави дека ги следи извештаите за инцидентот и дека државните власти соработуваат со полицијата за да се соберат повеќе информации, нагласувајќи дека „антисемитизмот и насилството немаат место во Мичиген“.
