Денешните американско-израелски напади врз Иран претставуваат најсериозна ескалација на тензиите на Блискиот Исток во последните години. Според официјални израелски извори, операцијата започна рано утрово со, како што беше наречено, „превентивен удар“.
Израел објави дека во акцијата учествувале со околу 200 борбени авиони и ова за нив бил најголемата воздушна акција досега спроведена. Целите во Иран биле ракетни лансери, противвоздушни системи и други воени објекти во западен и централен Иран. Израелската војска соопшти дека биле погодени стотици цели.
Кратко потоа, американски официјални лица потврдија дека и САД учествуваат во нападите. Американскиот претседател Доналд Трамп на прес конференција изјави дека се во тек „големи борбени операции“ против Иран. Вашингтон наведе дека целта е неутрализирање на закани кон американските сили и сојузници во регионот.
Иранските медиуми јавија за експлозии во Техеран и други градови. Според иранскиот Црвен полумесечина, пријавени се над 200 загинати и повеќе од 700 повредени во 24 провинции. Иранските власти ги оценија нападите како „агресија“ и кршење на меѓународното право.
Неколку часа подоцна, Иран возврати со ракетни напади врз американски бази во Катар, Кувајт, Обединетите Арапски Емирати и Бахреин. Во Израел се огласија сирени за тревога поради лансирани проектили од иранска територија. Погодени беа и објекти во близина на седиштето на Петтата флота на САД во Бахреин.
Повеќе заливски држави ја активираа противвоздушната одбрана и затворија дел од својот воздушен простор. Меѓународниот аеродром во Дубаи ги суспендираше сите летови на неопределено време.
Франција побара итна седница на Советот за безбедност на ОН, а Русија го осуди нападот како „неиспровоциран“ и понуди посредување.
Според странски медиуми, во нападите загинале повеќе високи воени функционери поврзани со ракетните и одбранбените системи на земјата. Дел од нив, како што се наведува, биле директно вклучени во стратешкото планирање на одбраната и офанзивните капацитети на Иран. Официјален Техеран соопшти дека станува збор за „таргетирани убиства“ насочени кон државниот и воениот врв. Иранските власти ги оценија ликвидациите како грубо кршење на меѓународното право и акт на државен тероризам. Порачаа дека одговорот ќе биде „решителен и пропорционален“ и дека одмаздата нема да запре додека не престане агресијата.
Иран официјално и порача на ОН дека ќе продолжи со одмаздата сè додека не престане американско-израелската агресија.
Регионалната безбедносна состојба на Блискиот Исток е крајно нестабилна, а дипломатијата засега се во сенка на воената ескалација.
