Силна зимска бура го зафати североистокот на САД, поради што денеска се затворени училишта, прекинат е јавниот превоз и откажани се илјадници авионски летови. Локалните власти предупредуваат на обилни врнежи од снег, силни ветрови и опасни услови за патување.
United States Postal Service соопшти дека невремето, кое го погодува подрачјето од Вашингтон до Нова Англија, може да предизвика доцнење во обработката и доставата на пошта и пакети.
Градоначалникот на Њујорк, Зохран Мамдани, прогласи вонредна состојба, а сите јавни училишта во градот денеска се затворени, без онлајн-настава и без воннаставни активности. Гувернерката на сојузната држава Њујорк, Кети Хочул, активираше 100 припадници на Националната гарда за помош во Лонг Ајленд, Њујорк и Долната долина Хадсон, каде што се очекуваат најинтензивни врнежи и крајбрежни ветрови.
Поради невремето е затворен и комплексот на седиштето на Обединети нации на Менхетен.
Според прогнозите, на североистокот се очекуваат и до 60 сантиметри снег, со удари на ветер до 110 километри на час, што го зголемува ризикот од прекин на електричната енергија и паднати дрвја.
Вонредна состојба е прогласена и во Масачусетс, а во Конектикат е забранет сообраќај за комерцијални возила на одредени автопати, освен за итни и неопходни испораки. И во Њу Џерси е прогласена вонредна состојба, со апел до граѓаните сериозно да ги сфатат предупредувањата.
Според податоците на сајтот за следење летови FlightAware, откажани се повеќе од 5.000 летови, а нови откажувања се најавени и за утре, особено на главните аеродроми во регионот.
Градскиот превозник „Њујорк транзит“ го прекина автобускиот и лесниот железнички сообраќај, а во Нова Англија, Управата за јавен превоз на Род Ајленд ги суспендираше сите услуги до подобрување на временските услови. Предупредувања за зимска бура се издадени за Њујорк, Лонг Ајленд, Бостон и крајбрежните области во повеќе сојузни држави.
