Тензии во самиот финиш го одбележаа прволигашкиот натпревар меѓу ФК Вардар и ФК Башкими, откако беше исклучен гостинскиот фудбалер Реџеп Мурати, по што следуваше мешаница меѓу двете клупи на средината од теренот.
Протестите на гостинските играчи не вродија со плод, а од Фудбалска федерација на Македонија излегоа со официјално појаснување.
Според ФФМ, во 87. минута од натпреварот од 19. коло на Првата МФЛ, играчот со број 3 од гостинската екипа добил директен црвен картон поради плукање кон главниот судија. Арбитерот бил на околу еден метар од инцидентот, јасно го забележал настанот и без двоумење ја донел одлуката, која била потврдена и од ВАР-судиите врз основа на видео-доказ.
Дополнително, ФФМ информира дека претходно исклучено службено лице од клупата на Башкими недозволено влегло на теренот и започнало конфронтација со фудбалерот на Вардар, Бобан Николов. Лицето било исклучено уште во првото полувреме и немало право повторно да влезе во игралиштето.
Од Федерацијата посочуваат дека причината за инцидентот произлегува од недозволивото однесување на гостинскиот играч и од влегувањето на исклученото службено лице, додека Николов бил санкциониран со жолт картон.
Натпреварот бил продолжен за 10 минути поради изгубено време, а прикажаното надополнување од +18 минути на ТВ-екраните, како што велат од ФФМ, претставува техничка грешка на продукцијата.
