Кога врне во Скопје не треба да се шета само со чадор, потребен ти е и непропустлив скафандер. Оти, од горе врне, а од страните возилата те тушираат затоа што на улиците има многу вирчиња.
До кога во главниот град ќе има сообраќајници кои градоначалниците ги нарекуваат модерни, а всушност се полни со нерамнии и секој дожд ги претвора во вирови? И плус, до кога градежниците нема да научат како се нивелираат шахтите да бидат на нивото со асфалтот, а не пропаднати?
Во Кисела Вода пак има еден кутар легнат полицаец, неколку пати му пропадна „душекот” – т.е. асфалтот. Те ќе му го поправат, те пак ќе пропадне.
Сличен градежнички „потфат” деновиве е видлив и на патот кон Теферич во Кисела Вода. Неодамна имаше реконструкција на улицата, ама еве дождот и свлечиште го испукал новиот асфалт за што тамошните граѓани објавија фотки на социјалните мрежи.
Доста е од ваков градежнички аматеризам кој скопјани скапо го плажаат.
Градежниците мора да прават поквалитетни улици. Градоначалниците мора да прават посериозни проверки на изграденото. Ако пак не го прават тоа, барем нека делат на скопјани скафандери и по некој сапун за подготвено да ги дочекаме возилата кои не „бањаат”.