Ракометарите на РК Охрид одиграа одличен натпревар и направија голем чекор кон пласман во следната фаза од ЕХФ Европски куп, совладувајќи го чешкиот тим Дукла Прага со убедливи 30-21 во првиот осминафинален дуел.
Охриджани фуриозно го започнаа натпреварот, отворајќи со серија од 6-0 и рано воспоставувајќи контрола врз играта. До крајот на првото полувреме ја задржаа сигурната предност и на паузата заминаа со водство од 16-9.
Во вториот дел домашниот состав продолжи со цврста одбрана и ефикасна реализација во нападот, не дозволувајќи им на гостите од Прага да се вратат во игра. Во еден момент предноста достигна и 13 голови разлика (30-17), а до крајот чешкиот тим само го намали поразот за конечни 30-21.
Најефикасен во редовите на Охрид беше Дарко Ѓукиќ со осум погодоци, додека Анте Иванковиќ постигна седум. Кај Дукла Прага, по четири голови реализираа Мелик, Дуда и Војтела.
Реванш натпреварот е закажан за 21 февруари, кога ќе биде познат патникот во следната рунда од натпреварувањето.
