Антивладиниот протест во Тирана прерасна во судири меѓу демонстрантите и полицијата, откако дел од учесниците се обидоа насилно да се приближат до зградата во која се наоѓа канцеларијата на премиерот Еди Рама. Опозицијата бара негова оставка поради обвинувања за корупција.
Протестот, организиран од здружената опозиција предводена од Демократската партија, започна мирно во центарот на албанската престолнина, но во вечерните часови ситуацијата ескалираше. Дел од демонстрантите фрлаа огномет и запаливи средства кон објектите на владините институции.
Полицијата интервенираше со водни топови и солзавец, а во централното градско подрачје беа распоредени околу 1.400 припадници на безбедносните сили.
Според официјалните информации, приведени се 21 лице, меѓу кои и четворица тинејџери. Запленети се 22 неексплодирани запаливи направи и шишиња со запалива течност. Во судирите се повредени најмалку 16 полицајци, а локалните медиуми известуваат и за повредени демонстранти, без точен број. За време на немирите било запалено и возило на телевизијата ABC.
Демонстрантите извикуваа пароли со кои бараа оставка од премиерот Рама, како и од вицепремиерката и министерка за инфраструктура Белинда Балуку, против која се води постапка од Специјалното обвинителство за борба против корупција и организиран криминал.
Лидерот на опозицијата Сали Бериша изјави дека протестите ќе продолжат сè додека не се најде политичко решение, оценувајќи дека актуелната власт ја довела земјата во длабока криза. Од владејачката Социјалистичка партија соопштија дека нападите врз полицијата претставуваат напад врз институциите и државата.
Властите најавија целосна истрага за насилствата и одговорност за сите кои учествувале во инцидентите.
