Педесет и двегодишен жител на Велес е приведен откако телефонски ги навредувал полициските службеници, а подоцна и агресивно се однесувал кон нив на терен, информира Министерството за внатрешни работи.
Според полицијата, на 7 февруари 2026 година околу 20:30 часот, полициски службеници од СВР Велес го лишиле од слобода М.У. (52) од Велес. Тој претходно се јавил во полициска станица и ги омаловажувал полицајците, а подоцна на улицата „Јовче Тикваров“ го нарушил јавниот ред и мир, однесувајќи се агресивно кон службените лица кои извршувале службени дејствија.
При преземање на мерките било утврдено дека лицето било во тешка алкохолизирана состојба. Алкотестот покажал 3,06 промили алкохол во крвта.
Лицето било задржано во полициска станица, а по целосно документирање на случајот против него ќе бидат поднесени соодветни пријави, соопшти МВР.
