Патниот правец А3 Битола–Ресен кај месноста позната како Ромска населба повторно беше блокиран, откако група граѓани излегоа на протест во знак на револт поради новите мерки за одземање возила на лица што управувале без положен возачки испит.
Прекинот на сообраќајот беше официјално евидентиран попладнево околу 14:30 часот, а од Авто-мото сојуз на Македонија (АМСМ) потврдија дека на оваа делница нема да се движи сообраќај додека трае јавниот собир.
Според локалните медиуми, околу 200 лица, главно од ромската заедница, поставија оган, запалија гуми, пластика и друг отпад на коловозот, што создаде густ чад и значително го попречи движењето на возилата. Присутни беа и полициски екипи кои ја следеа ситуацијата и преземаа мерки за одржување на јавниот ред и безбедноста, но засега нема официјални информации за приведени или повредени.
