Полициски службеници лишија од слобода двајца возачи во Струга и во кавадаречкиот регион, откако управувале возила под дејство на алкохол и предизвикале сообраќајни несреќи.
Утрово полициски службеници од ОВР Неготино лишија од слобода 29 годишник од село Глишиќ, кавадаречко. Приведениот, на регионалниот пат Неготино–Кавадарци, управувајќи патничко возило „фиат“ со кавадаречки регистарски ознаки, излетал надвор од коловозот. При преземање мерки било утврдено дека го управувал возилото под дејство на алкохол, при што му биле измерени 1,96 промили алкохол во крвта.
Во текот на вчерашниот ден пак, на улицата „Пролетерски бригади“ во Струга, полициски службеници од ОВР Струга лишиле од слобода 36 годишник од Струга. Тој управувајќи патничко возило „ауди“ со струшки регистарски ознаки, удрил во паркирано патничко возило „мерцедес“, сопственост на 23 годишник од село Франгово. По извршените проверки било констатирано дека приведениот имал 2,25 промили алкохол во крвта, по што бил задржан во полициска станица.
По целосно документирање на настаните, против двајцата возачи ќе бидат поднесени соодветни пријави по член 297-а од Кривичниот законик – „безобѕирно управување со моторно возило“.
