Кичевската полиција поднела кривична пријава против Фатмир Дехари, поранешен градоначалник од ДУИ, поради постоење основи на сомнение за сторено кривично дело „злоупотреба на службена положба и овластување”. Заедно со него пријава добиле уште 4 други лица за кривично дело „перење пари”.
Според информациите од полицијата, Дехари во периодот од 2021 до 2025 година, во својство на градоначалник на Кичево, свесно и со умисла постапувал спротивно на одредбите од Законот за работни односи и Законот за локална самоуправа, при што склучил договори за вработување со останатите пријавени лица. Потоа, со пропуштање на должен надзор, им дозволил тие да не доаѓаат на работа, а истовремено да им бидат исплаќани плати, надоместоци и придонеси од општинската каса, без по истекот на законскиот рок да им биде прекинат работниот однос.
На овој начин, според пријавата, буџетот на Општина Кичево бил оштетен за околу 130.000 евра.
