Основното јавно обвинителство во Гевгелија отвори истражна постапка против едно лице, осомничено дека во периодот од октомври 2025 до 23 јануари 2026 година, во угостителски објект во селото Јосифово, неовластено поседувало наркотични дроги со намера за нивна продажба.
При преземените активности, било утврдено дека осомничениот чувал над 120 грама марихуана, повеќе од 750 грама хашиш, како и околу 37 грама мешавина од марихуана и хашиш. Наркотиците биле спакувани во најлонски и хартиени пакувања и сокриени во пластична кофа поставена под работна иноксна маса во објектот. Во текот на претресот, полициските службеници пронашле и пластична дигитална вага со траги од наркотична материја.
Врз основа на овие наоди, постои основано сомнение дека лицето сторило кривично дело неовластено производство и ставање во промет наркотични дроги, психотропни супстанции и прекурсори, казниво според член 215 став 1 од Кривичниот законик.
Во рамки на истиот предмет, осомничени се уште три лица, за кои се сомнева дека биле вклучени во меѓусебна препродажба на марихуана во близина на лозови насади во Јосифово. Според истрагата, на 21 јануари едно од лицата продало околу 680 грама марихуана на друго лице, кое дрогата ја чувало во помошен објект – штала.
Наредниот ден, наркотичната дрога била пренесена во селото Пирава, кај трето лице, со цел препакување и посредување во понатамошната дистрибуција. При извршените претреси, полицијата ја пронашла спорната дрога, дополнителни количини марихуана, семки од растението канабис, како и вага со остатоци од наркотична материја.
Јавниот обвинител до надлежниот судија на претходна постапка при Основниот суд во Гевгелија достави предлог за определување мерка притвор за сите четворица осомничени.
