Агенцијата Reuters јави дека експертите кои ја истражуваат железничката несреќа во Шпанија, во која загинаа најмалку 39 лица, утврдиле дека причина за излетувањето на брзиот воз од шините најверојатно е скршен спој меѓу шините. Информацијата ја потврдил извор запознаен со текот на првичната истрага.
Несреќата се случила во неделата во близина на градот Адамуз, во јужната покраина Кордоба, на околу 360 километри јужно од Мадрид. Вагони кои излетале од шините се судриле со воз што доаѓал од спротивната насока, по што двата воза биле исфрлени од пругата и се стркалале по насипот. Оваа трагедија се вбројува меѓу најтешките железнички несреќи во Европа во поновата историја.
Техничарите на терен утврдиле дека постоело значително абење на спојот меѓу деловите од шината, познат како рибарска плоча, што укажува дека дефектот не настанал одеднаш, туку се развивал подолг период. Според истрагата, неисправниот спој создал јаз меѓу шините кој постепено се зголемувал додека возовите продолжувале да сообраќаат по пругата.
Изворот за Ројтерс, кој побарал анонимност, изјавил дека истражителите сметаат оти токму овој дефект е клучен за утврдување на точната причина за несреќата. Првите вагони од возот управуван од компанијата Iryo успеале да поминат преку оштетениот дел, но осмиот вагон излетал од шините, повлекувајќи ги со себе и шестиот и седмиот вагон.
Iryo е приватен железнички оператор, во мнозинска сопственост на италијанската државна железничка група Ferrovie dello Stato.
Фотографиите од местото на несреќата, споделени од Guardia Civil, прикажуваат јасна празнина во шината, обележана со полициски маркери, додека форензичките екипи вршеле увид.
Шпанската Комисија за истрага на железнички несреќи (CIAF), задолжена за целосната истрага, засега не се огласила со официјален коментар. Меѓу официјалните лица кои го посетиле местото на трагедијата биле и премиерот Педро Санчез и министерот за транспорт Оскар Пуенте. Санчез поради несреќата го откажал учеството на Светскиот економски форум во Давос.
