Фудбалската репрезентација на Сенегал е победник на овогодинешното издание на Африканскиот куп на нации. Во финалниот натпревар, Сенегал со минимални 1:0 по продолженијата успеа да го совлада домаќинот Мароко и по втор пат во својата историја да ја освои престижната титула, по успехот во 2021 година.
Херој на Сенегал беше Папе Гај, кој го постигна единствениот гол на натпреварот во четвртата минута од првото продолжение.
Финалето претходно беше обележано со сериозен контроверзен момент во самиот финиш на регуларниот дел, кога главниот судија досуди пенал за домаќинот. Одлуката предизвика жестоки реакции кај фудбалерите на Сенегал, кои во еден момент размислуваа и за напуштање на теренот. По околу дваесет минути прекин и консултации, натпреварот продолжи, а одговорноста за изведување на пеналот ја презеде Брахим Диаз, кој сепак не успеа да погоди, промашувајќи со обид за „паненка“.
По тој момент, Мароко очигледно психолошки потклекна, додека Сенегал во продолженијата доминираше на теренот, создаде повеќе шанси и сосема заслужено го подигна победничкиот пехар.
