Пет лица го загубија животот во две одделни лавини што во саботата ја погодија Австрија, информираа од планинската спасувачка служба во покраината Салцбург.
Најтешкиот инцидент се случил во попладневните часови на врвот Финстеркопф, во долината Гросарл, на надморска височина од околу 2.150 метри. Лавина затрупала група од седум скијачи, при што четворица биле извлечени без знаци на живот. Останатите три лица се здобиле со сериозни повреди и биле пренесени на лекување.
Неколку часа претходно, уште една лавина одзела живот на жена во областа Бад Хофгастајн, со што бројот на жртви во текот на денот се искачи на пет.
Од спасувачките служби предупредуваат дека снежните услови во планинските предели се нестабилни и дека ризикот од лавини е зголемен. Апелираат до скијачите и планинарите строго да ги почитуваат безбедносните препораки, како и официјалните временски и лавински предупредувања.
