По смртоносниот пожар во ноќен клуб во Кран-Монтана, во кој голем број луѓе се здобија со тешки изгореници, Центарот за производство на кожни клетки при Универзитетска болница во Лозана (CHUV), единствен од ваков вид во Европа, работи со полн капацитет за да им помогне на повредените, јавуваат швајцарските медиуми.
Болницата во моментов лекува седум пациенти со тешки изгореници од трагедијата во Кран-Монтана. Според експертот на центарот, Лоран Карез, приоритет е да им се обезбеди најдобра можна грижа на повредените.
Од несреќата, во која загинаа 40 лица, а 116 беа повредени, од кои дел сè уште се хоспитализирани, центарот работи без прекин, седум дена во неделата. Станува збор за единствена установа која може да произведе толкаво количество кожно ткиво, при целосно почитување на швајцарското и европското законодавство.
Процесот се базира на земање парчиња здрава кожа од самите пациенти, со цел да се намали ризикот од отфрлање на трансплантацијата. Карез објасни дека од само 10 квадратни сантиметри здрава кожа може да се произведат една до три серии од по 2.600 квадратни сантиметри кожно ткиво, што приближно одговара на површината на човечки грб. Ова лабораториски одгледано ткиво не содржи коса или потни жлезди.
Центарот досега примил 15 барања за трансплантација на кожа поврзани со пожарот во Кран-Монтана, додека вообичаено обезбедува ваков тип трансплантации за околу 20 пациенти годишно.
Специјалистот за тешки изгореници Оливие Пантет истакна дека улогата на центарот е од клучно значење, особено кога 50 до 60 проценти од телесната површина е зафатена со изгореници.
Во такви случаи, како што посочи, кожата мора да се одгледува во лабораториски услови, бидејќи преостанатата здрава кожа не е доволна за лекување. Сепак, успехот не е секогаш загарантиран.
„Доколку трансплантираната кожа биде прифатена во 80 проценти од случаите, тоа го сметаме за одличен резултат“, нагласи Пантет.
