Американската воена интервенција во Иран сè повеќе изгледа како реална опција и би можела да започне веќе во следните 24 часа, јавува Ројтерс, повикувајќи се на европски официјални извори.
Според еден европски функционер, можноста за американска воена акција значително се зголемила, а временската рамка за евентуална интервенција веќе се мери во часови, а не во денови. Друг европски извор оценил дека воениот ангажман на САД во моментов изгледа веројатен.
Израелски функционер изјавил за Ројтерс дека се чини оти американскиот претседател Доналд Трамп веќе донел одлука за интервенција, иако засега не е познато кога би започнала операцијата ниту колкав би бил нејзиниот обем.
Во меѓувреме, според истите извори, Соединетите Американски Држави и Обединетото Кралство повлекле дел од својот персонал од воздушна база во Катар, по заканите од Техеран за можни одмазднички напади врз американските воени бази во регионот.
Иранските власти, истовремено, ги предупредиле соседните држави дека евентуален американски или израелски напад би можел да има сериозни регионални последици.
Тензиите дополнително се зголемиле по изјавите на Трамп, кој јавно ги повикал демонстрантите во Иран да продолжат со протестите, наведувајќи дека „помошта е на пат“, без да даде дополнителни детали.
