Основното јавно обвинителство Скопје поведе постапка против две државјанки на Република Бугарија, за кои постои основано сомнение дека сториле повеќе кривични дела кражба, казниви по член 235 став 1 од Кривичниот законик.
Според обвинителството, првоосомничената во најмалку пет наврати, од кои последниот заедно со второосомничената, крадела паричници од различни лица. Во паричниците имало готовина, банкарски картички и лични документи, по што осомничените се обидувале, а во неколку случаи и успевале, да подигнат дополнителни суми пари од банкомати.
Еден од потешките случаи се случил на 4 април 2025 година во автобус број 7 на ЈСП Скопје, на релација Поликлиника Букурешт – Рекорд. Таму била украдена парична торбичка со 2.600 денари, банкарска картичка и документи. Иако оштетениот веднаш се обидел да ја блокира сметката, од банка бил информиран дека веќе биле подигнати 30.000 денари од банкомат.
Во текот на август 2025 година, во трговски центар во Скопје, осомничената во три одделни наврати извршила кражби на паричници, при што првично прибавила противправна имотна корист од околу 39.000 денари. Подоцна, од една од украдените картички, успеала дополнително да повлече уште 60.000 денари во два наврати.
Последниот инцидент се случил на 4 јануари 2026 година, кога двете осомничени заедно украле паричник и лични предмети од оштетена во вредност од околу 3.000 денари. По кражбата, два пати неуспешно се обиделе да подигнат пари од банкомат.
Обвинителството испитува и дополнителна одговорност, откако било утврдено дека во случаите кога биле успешно подигнати пари, ПИН-кодовите биле запишани и чувани во паричниците на жртвите, најчесто повозрасни лица. Поради тоа, се проверува дали постојат елементи и на кривично дело оштетување и неовластено навлегување во компјутерски систем.
За двете странски државјанки е предложена мерка притвор.
