Трагичен несреќен случај се случи денеска претпладне во Дебар, каде што 40-годишен жител на градот го загуби животот откако паднал од станбена зграда во изградба, на која извршувал работни задачи.
Според информациите, мажот се здобил со тешки телесни повреди и починал за време на транспортот кон Општата болница со проширена дејност во Дебар. Од Секторот за внатрешни работи информираат дека случајот бил пријавен околу 11:35 часот.
Портпаролот на СВР Охрид, Стефан Димоски, соопшти дека, според првичните информации, несреќата се случила околу 11:15 часот на градилиште на улицата „Братство единство“, каде што починатиот бил ангажиран како работник.
На местото на настанот излегле јавен обвинител и трудов инспектор, а увидот го извршила екипа од ОВР Дебар. Причините за несреќата ќе бидат утврдени по целосно расчистување на случајот.
Жители на Дебар информираат дека станува збор за нивен сограѓанин, кој работел на поставување врати и прозорци на објектот. Го опишуваат како вреден и чесен човек, а веста за неговата смрт предизвика тага и вознемиреност меѓу граѓаните.
