Повеќе од 11.000 домаќинства во неколку окрузи во Романија останаа без електрична енергија поради силното невреме и обилните снежни врнежи. Според министерот за енергетика Богдан Иван, без струја се погодени окрузите Алба, Марамуреш, Салаж, Прахова и Клуж.
На терен се ангажирани 341 екипа со над 900 стручни лица, кои досега реализирале повеќе од 5.000 интервенции. За отстранување на дефектите се користи тешка механизација, кранови, дронови и моторни санки, бидејќи дел од оштетувањата се наоѓаат во тешко пристапни планински предели каде патната инфраструктура сè уште е блокирана.
Министерот најави дека снабдувањето со електрична енергија треба целосно да се нормализира до крајот на неделата, но предупреди дека од недела следува нов студен бран со температури под нулата, што може да предизвика дополнителни прекини. Тој увери дека земјата располага со доволни количини гас, посочувајќи дека складиштата се исполнети со околу 70 отсто од капацитетот, што е над европскиот просек.
Невремето предизвика и сериозни проблеми во железничкиот сообраќај, со доцнења од четири до пет часа, особено во регионите на Крајова и Темишвар. Снежниот бран го зафати и Букурешт, каде првиот снег за годинава значително го отежна сообраќајот на првиот училишен ден во 2026 година.
