Белата куќа соопшти дека американското Министерство за финансии на САД од почетокот на годината собрало 235 милијарди долари приходи од царини.
Ова тврдење беше изнесено за време на божиќен пренос во живо на официјалниот Јутјуб-канал на Белата куќа, во кој наизменично се прикажуваше листа на, како што беа наречени, „победи на МАГА (MAGA) во 2025 година“, проследени со музика во позадина. На левата страна од поделениот екран се прикажуваа текстуални пораки со наводни успеси на администрацијата на Доналд Трамп, меѓу кои миграциската политика и борбата против кризата со фентанил, пренесе ДПА.
На десната страна од екранот беше прикажана анимирана верзија на Трамп како чита книга покрај божиќна елка.
Пријавениот износ од 235 милијарди долари е нешто повисок од бројките што претходно ги соопштуваше администрацијата. Минатата недела, Управа за царина и гранична заштита на САД соопшти дека од инаугурацијата на Трамп на 20 јануари до 15 декември биле собрани нешто над 200 милијарди долари од царини.
И покрај тоа, приходите не ги исполнија првичните очекувања. Во јули, американскиот министер за финансии Скот Бесент прогнозираше дека до крајот на годината ќе бидат собрани околу 300 милијарди долари.
Во меѓувреме, Врховниот суд на САД ја разгледува законитоста на царините воведени од Трамп, односно дали тој имал право еднострано да ги воведе врз основа на законот за вонредни состојби од 1977 година, без одобрение од Конгресот. Пониските судови претходно ја блокираа оваа политика по тужбите поднесени од повеќе американски компании и сојузни држави.
По преземањето на функцијата, Трамп го користеше овој закон за воведување царини на стоки од повеќе земји, повикувајќи се на заканите од фентанил, илегалната миграција и трговскиот дефицит. Засега не е познато кога Врховниот суд ќе ја донесе конечната одлука, која, доколку биде негативна за Трамп, би можела да ги доведе во прашање постојните трговски договори.
