Полицискиот систем „Сејф сити” воведува ред во скопскиот сообраќај, иако се уште не е пуштен во официјална употреба. Видливо е на улиците дека се вози поспоро, а и црвеното на семафорот се повеќе е навистина црвено.
Воедно и статистиката покажува дека се намалуваат сообраќајните несреќи, и што е особено добро нема, како порано, многу потешко повредени лица.
До февруари кога ќе почне казнувањето се очекува кај скопјани уште повеќе да се стекне навиката за возење според правилата и прописите. Останува до февруари и надлежните служби малку повеќе да ги спастрат семафорите, да се постават сообраќајни знаци секаде каде што налагаат прописите и пред се да се подзакрпат дупките по улиците и тротоарите.
За овие два месеци и сообраќајната полиција треба да тренира малку повеќе соодветно работење на улиците, оти „Сејф Сити” не е направен да ги регистрира сите прекршоци.