Љупчо Коцевски заминува од функцијата државен јавен обвинител. Тој денеска поднесе неотповиклива оставка на функцијата, по што претседателот на Собанието Африм Гаши истакна дека за денеска најавената парламентарна расправа за негово резрешување е беспредметна па така таа точка на дневниот ред нема да се разгледува.
Инаку, Коцевски, го оцени како политичка одлука предлогот на Владата за негово разрешување и дека тоа не е поради негово непрофесионално работење туку затоа што отворено зборувал за проблемите и за недостатокот на ресурси.
„Заминувам со гордо крената глава, но и со разочараност поради очигледното непочитување на принципите врз кои почива правната држава”.
Коцевски истакна дека дури денеска во 10 часот, еден час пред закажаната седница за негово разрешување, му била доставена поканата за присуство, а не му бил доставен ниту предлогот за разрешување.
Од друга страна, Владата во Предлогот за разрешување посочи дека сето ова се бара поради – направени крупни професионални грешки при раководењето на Јавното обвинителство; неовластено изнесување на информации и податоци за судски предмети со што ја повредил обврската за заштита на тајноста на постапката утврдена со Закон и нарушување на угледот на Јавното обвинителство.
