Опожарено тело на машко лице е пронајдено по пожар што синоќа избил во круг на фабрика на подрачјето на општина Гази Баба во Скопје, соопшти Министерството за внатрешни работи.
Како што информира полицијата, на 13 декември 2025 година во 21:29 часот во СВР Скопје било пријавено дека избил пожар во два магацина во кругот на фабриката. Објектите се сопственост на М.Р. (46), кој истите ги изнајмувал на други лица.
На местото интервенирала екипа на Бригадата за противпожарна заштита на Град Скопје, која го изгаснала пожарот. При денешниот увид, извршен на 14 декември, во еден од магацините, кој под наем го користел М.А. од Скопје, било пронајдено опожарено тело на машко лице.
Од МВР засега не го соопштуваат идентитетот на починатиот, ниту причините за настанување на пожарот. Истрагата е во тек.
