Илјадници граѓани и синоќа ги исполнија плоштадите во Софија на масовен протест под слоганот „Оставка! Пеевски и Борисов надвор од власта“, организиран од коалицијата „Продолжуваме со промената – Демократска Бугарија“. Демонстрантите бараат оставка од владата и нови избори.
Според извештајот на БТА, демонстрантите го наполнија просторот од статуата „Света Софија“ до зградата на Народното собрание, вклучувајќи ги плоштадите „Независност“, „Атанас Буров“, дел од булеварот Цар Освободител и улицата Г.С. Раковски.
Организаторите на протестот собираа и потписи за петиција за оставка на владата, а на присутните им делеа налепници со QR-кодови преку кои граѓаните можат да се информираат и електронски да ја поддржат иницијативата.
На фасадата на Парламентот демонстрантите испишуваа пораки со зелени и црвени ласери: „Оставка“, „Мафијата надвор“, „Кој го нарача ова безобразие?“ и „За фер избори“.
Луѓето протестираа, носејќи транспаренти со сатирични и остри политички пораки. На еден постер, лидерот на „ДПС – Нов почеток“ Делјан Пеевски е прикажан како држи палка со глава на министерот за внатрешни работи Даниел Митов. Други плакати го прикажуваат претседателот Румен Радев со натпис: „Кажи за Боташ“.
На големите видео-бимови околу плоштадот се прикажуваа сатирични видеа, изработени со вештачка интелигенција. На нив Пеевски и Борисов се прегрнуваат и си изразуваат љубов, а во друго видео Пеевски наводно го удира Тошко Јорданов од „Има таков народ“, додека тој се смее. Публиката секое појавување на Пеевски на екранот го пречекуваше со гласни негодувања.
Демонстрантите повеќепати скандираа „оставка“, а пејачката Невена Пејкова застана пред толпата и ја испеа строфата: „Кога ќе падне Пеевски, не сакам да бидам долу, за да не падне врз мене“, по што присутните ја продолжија песната заедно со неа.
Неколкумина демонстранти се качија на прозорците на првиот кат од Народното собрание, јави БТА. На протестот се веат бугарски и европски знамиња, а дел од транспарентите ги прикажуваат Пеевски и Борисов зад решетки.
