Арсими и Пелистер одиграа возбудлив и ефикасен натпревар во Гостивар, со кој беше спуштена завесата на 16. коло од Првата македонска фудбалска лига. Двата тима приредија вистински фудбалски спектакл кој заврши без победник – 3:3.
Гостинската екипа од Битола одлично го отвори мечот и поведе во 16. минута преку Вилдан Керим. Предноста ја удвои Александар Ристовски во 33. минута, носејќи му солидно водство на Пелистер пред паузата.
Во второто полувреме Арсими се врати во игра со погодокот на Шефити на самиот старт, за намалување на 1:2. Сепак, во 56. минута Пелистер повторно се одлепи откако по досуден пенал Ристовски беше прецизен за 1:3.
Драмата кулминираше во самиот финиш. Шпенд Асани во 80. минута намали на 2:3, а само една минута подоцна Бешагиќ ги постави конечните 3:3 и му донесе бод на домашниот тим.
Со овој бод, Арсими заминува на зимската пауза на шестата позиција со 22 освоени бода, додека Пелистер ќе ја дочека паузата на деветтото место со 16 бода.
